1Cor 14 | MHL | STEP | Aria ni maa mauwa oni-ikiwemi ni fain onowa kema kaalalem-ikeka, mua wia kookalowa nain. Ne pun Ewar Eliwa amisa yiemi uuwowa ononer yiiya nain manek akena kookalemi ni fain kookal-afureka, Mua Maneka opora baliwep wia fookomowa nain. Naemi uuwowa nain Mua Maneka faremi nokareka.

1 Corinthians 14

Mua Maneka opora wia fookomowa uuwowa nain maneka-ke

1 Aria ni maa mauwa oni-ikiwemi ni fain onowa kema kaalalem-ikeka, mua wia kookalowa nain. Ne pun Ewar Eliwa amisa yiemi uuwowa ononer yiiya nain manek akena kookalemi ni fain kookal-afureka, Mua Maneka opora baliwep wia fookomowa nain. Naemi uuwowa nain Mua Maneka faremi nokareka. 2 Ewar Eliwa-ke mua oko-ko kema iweya opora sira onaiya aakuneya mua papako wiar miimap kemena me aawikuan. Nain o me wi mua wia maakinon. Mua Maneka wameiya aakunemi maa kokot ikua nain mainon.

3 Ne aria mua oko Mua Maneka-ke amisa iweya opora wiar aawep kemena wia fookominon. Naeya wi opora miimap Mua Maneka kema suuwowa kekanikuan, Mua Maneka opora ookowa kema urupemi, kekanep ikaiwkin akimowa-ko imenarinon-na kema eliwiw ikaikuan. 4 Aria mua eena opora sira onaiya aakuniya nain ona waisow amisarep kema eliwiw ikainon. Ne mua eena Mua Maneka-ke amisa iweya opora wia fookomiya nain-ke Mua Maneka teeria manek akena wia asipinon. 5 Nain yo feenap maiyem, Ewar Eliwa amisa nieya ni unowiya opora sira onaiya eliw aakunowen. Nain yo fain manek akena kookaliyem, Ewar Eliwa amisa nieya ni unowiya Mua Maneka opora kokot ikua nain kemena mua wia fookomaka. Opora sira onaiya muutiw aakunimik nain Mua Maneka teeria me senam wia asipimik, wi Mua Maneka opor kemena wia fookomimik nain-ke Mua Maneka teeria manek akena wia asipimik. Ne aria mua opora sira onaiya aakuniya nain, opora nain aakunep weesereya ona-keriw opor kemena wia fookominon-na eliw. Naap oninon-na makena, Mua Maneka teeria pun wia asipinon.

6 Aria emar unowik, yo ikip ni niamiya ikok opora sira onaiya muutiw aakuninen-na yo kamenap onap nia asipinen? Ne Mua Maneka opora yieya opora kokot ikua nain maemi makena nia fookominen-na eliw nia asipinen. Ne Mua Maneka sira onomakek nain opora baliwep nia ookominen-na, nain pun, nia asipinen. 7 Naeya opora sira onaiya aakunimik nain fain saarik, wi pia momor fuuriwkin-i e oka momor paiwkin miimap maimik, “Nee, someka kain awemi oka naap paimik noma.” 8 Ne wi irakowa naep puuw baliwep me fuurikuan-na wi irakow mua ikemik nain kamenap miimap amisarep irakowa iikirikuan? 9 Naapeya nis pun opora sira onaiya nainiw wia maakowen-na wi miimap kamenap niar amisarikuan? Neek aakunem-ikaiwkin niar miimap momor maneka ikaikuan. Naeya ni nomokow pia saarik wia maakem-ikowen.

10 Aria oko feenap, miiw unowa opora ononer ikomakek. Naeya wiena opor epaskun-ke wiena opora-pa maiwkin wi eliw amisarikuan. 11 Nain mua oko-ke opor oko-pa efa maakeya-na yo opora nain me wiar amisarep maa mauwa maiya nainen. Naeya i yiam erup yiam maiyen, “O owow oko mua-ke,” naap yiam maiyen.

12 Aria ni Ewar Eliwa amisa yieya uuwowa ononer oniyen, kema manek akena naap maiman. Ne Mua Maneka naap nokarem-ikaiwkin uuwowa ononer eliw niinok. Naeya ni niena teeria manek akena niam asipam-ikowen.

Opora sira onaiya aakunow sira

13 Ni Mua Maneka teeria niam asipam-ikowa nain uuwow maneka-ke. Naapeya mua-ko opora sira onaiya aakuniya nain kiiriw yiena Maneka nokarinok, ne ona opora nain kemena pun fookomaya wia maakinok. 14 Naap oninon-na eliw. Aria yo nain maemi yena yame mainen. Yo Mua Maneka faremi opora sira onaiya wameiya aakuniyem. Nain feenap, yena kukusa-ke Mua Maneka wameiya aakuninon. Ne yo yena woosa me yame furewinen, yo maa mauwa maiyem nain. 15 Naeya yo kiiriw kamenap oninen? Yo feenap oninen-na eliw-yon. Yena kukusa-ke Mua Maneka wameiya aakunem-ikaeya yena kema-pa amisarem-ikainen. Ne someka pun naap, yena kukusa-ke ne yena woosa pun amisarep someka nain awinen. 16 Naapeya ni opora sira onaiya muutiw me aakuneka. Oko no naap onami Mua Maneka unuma wiar piram-ikaeya mua papako opora nain me nefar amisaremik nain kemena me nefar aawikuan. Naeya wi kamenap opora nain makena-ke nefar naikuan? 17 Moram no naisow nan opora sira onaiya Mua Maneka wameiya baliwep aakunemi sira eliwa naakem-ikaeya mua oko kemena-ko nefar aawinen nainon-na wia. Naeya kema me iikirinon.

18 Aria yo Mua Maneka sira eliwa naakiyem, moram Ewar Eliwa-ke amisa yieya yo anane opora sira onaiya aakuniyem, ni oniman nain nia nomakiyem. 19 Nain yena yaisow ikok naap oniyem. Ne Krais teeria fiirimowa-pa opora sira onaiya maala aakunowa me oniyem naiyem. Yo fain kookaliyem. Yo maa kema suuwap Mua Maneka opor ariman aakunemi suule wiinen, ne opor iiwa pun kema eliw aawikuan.

20 Aria emar unowik, ni gia sira saarik ikok maa momor oniman, nain piipueka. Mua iperowa saarik maa kema suuwap oneka. Aria sira samora onowa nain-ke, gia kema saarik ikok sira samora me oneka. 21 Naemi opora sira onaiya aakunimik nain maiyem, Mua Maneka opora iiriw wiar siisimep-puamik nain feenap, Mua Maneka ona teeria wi Isrel feenap wia maek,

“Yena teeria-na wi emina kekaniwkin yos-ke owow oko wia sesekamkun wi iiwuaremi wiena oporiw wia maakemik-na wia. Wi kema-ko me kiremik. Wi emina naap kekanem-ikemik.”
(Aisaiya 28.11-12)

22 Naapeya feenap maiyem, opora sira onaiya aakunimik nain wi emina kekanep Mua Maneka opora wiar fienimik nain wi naep Mua Maneka-ke mua oko kema wieya opora sira onaiya wia maakimik. Me wi Mua Maneka opora ookimik nain wia naep naap onamik, weetak. Aria opora kokot wia fookomimik nain Mua Maneka-ke amisa wieya wi o opora ookimik nain muutiw wia naep opora kakeniw wia maakimik. Me wi Mua Maneka opora wiar fienimik nain wia naep aakunimik, weetak.

23 Ne aria ni teeria unowiya niam fiirimep ikok unowiya opora sira onaiya aakunem-ikaiwkin-na wi sisin mua ne wi mua enuma niar kererep naap nia urufap nia maikuan, “Wi faa, momoraremik aa.” Yo makena maiyem-i? 24 Ne aria ni unowiya niam fiirimep Mua Maneka-ke amisa nieya opor kokot wia fookomowen-na mua enuma-ko kererep opora unowa nain miimap kema kirep mainon, “Aa, yo mua eliw marew.” Naap maep iiriw pina onap pipilimep-puak nain wame furewap iiwawun wasirkinon. Naemi keema muuna miiwa-pa mikap maara mikami Mua Maneka unuma fakerami mainon, “Makena, Mua Maneka ni niamiya ikaiya.”

Lotu fiirimowa-pa baliwep ikowa

26 Naapeya emar unowik, feenap maiyem, ni niam fiirimiman nain feenap oneka. Mua oko someka awowa kema urupinok-na awinok. Mua oko Mua Maneka opora wia wafurominok, mua oko Mua Maneka-ke opora iweya kakeniw nia maakinok. Ne mua oko opora sira onaiya aakuninok. Ne mua oko-ke opora nain kemena nia maakinok. Ni naap mua kui-kuisow uuwowa ononer onami ni unowiya niam kekanoweka. Naemi Mua Maneka sira baliwep wiar ookowen. 27 Aria mua papako opora sira onaiya aakunu naep-na mua arow muuta aakunuk, e erup pun eliw. Nain mua unowa wia. Feenap oneka, mua oko-ke opora sira naap aakunep weesereya mua oko oram ikua nain-ke opora nain wiar kiripap kemena nia maakinok. Weesereya mua oko-ke aakuninok. Naap oni-ikiweka. 28 Aria opora sira onaiya aakuniwkin kemena nia maakow mua mareweya-na opora sira onaiya aakunowa neek ikainok. Mua oko-ko opora sira naap aakunowa kema wiar urupinok-na ona waisow neeke kema-pa muninemi Mua Maneka wameiya aakuninok.

29 Aria Mua Maneka amisa nieya opora kakeniw wia maakowa nain pun sira naap, mua arow erup naap aakunuk. Mua kuisow aakuneya mua papako opora nain baliwep wiar miim-afurap wiar furewuk. 30 Aria mua oko opora nia maakem-ikaeya mua oko-ke mainon, “Yos pun Mua Maneka-ke opora yieya aakunekam naep.” Naap maeya-na mua o kiikir aakunem-ikaiya nain opora sileweya mua oko nain-ke eliw aakuninok. 31 Naap onam-ikeka, moram Mua Maneka ni unowiya kema nieya opora fiirimowa-pa eliw niam maakowen. Nain mua kuisowiw aakunem-ikeka. Naeya ni unowiya amisa aawep kema kaalalemi Krais sira wiar ookowa nain kemaiw ikowen. 32 Ne oko pun, Mua Maneka kema nieya opora wia maakowa nain ni kema ikeman. Eliw mua niam arewap aakuneka. 33 Moram Mua Maneka i lotu fiirimowa-pa maa momor wiisa onowa nain me yiar kookaliya. Ne i balisow ikok kui-kuisow maa oni-ikiwem-ikowa nain yiar kookaliya.

Aria yiena Maneka Yeesus Krais teeria owow unowa-pa ikemik nain sira feenap onimik. 34 Wi emeria-ke lotu-pa opora me wia wafuromuk. Moram wi lotu-pa opora wia wafuromowa emi wia wuamik. Naeya wi popora ikok opora miimow muutiw ikauk. Moram Mua Maneka iiriw Moses sira maakek nain siisimep-puiwkin ikua, nain pun naap wia maek, wi aakunowa marew opora miimam-ikauk. 35 Aria wi maa-ko amisaru naep-na ikoka koora ikiwep wiena mua eliw nokariwkin wia maakuk. Moram wi emeria lotu fiirimowa-pa mua unowa mokok epa-pa aakunimik nain emin ururowa sira-ke.

36 Aria ni yo opora me efar miimowen-na yo feenap nia maakinen, nis-ke mokomokoka Mua Maneka opora wiar miimap wia maakem-miaweman-i e yos-ke? Ne ni niisow muuta Mua Maneka opora nia maakiwkin miimaman-i? Nain weetak. 37 Ne mua-ko ona wame mainon-na, “Yo Mua Maneka-ke amisa yieya opora wia maakiyem,” naap wame mainok-na aria feenap yo efa mainok, “Pol opora siisimok nain Mua Maneka-ke maakeya siisimok,” naap efa mainok. Ne mua-ko ona wame mainon-na, “Yo Ewar Eliwa-ke efa kekanoweya amisa aawem,” naap wame mainok-na yos pun naap efa mainok. 38 Aria mua-ko yo opora nia siisimomam nain opora efar fieninok-na mua nain opora me wiar miimeka. 39 Ne aria yo aakisa feenap nia maakiyem, wi mua fiirimowa-pa opora sira onaiya aakunimik nain emi me wia wueka, neek aakunuk. Ne ni uuwowa fain kookal-afureka, Ewar Eliwa amisa nieya opora kakeniw wia maakowa nain. 40 Nain ni fiirimowa-pa maa onu naep-na baliwep ikok mua kui-kuisow aakunem-ikeka.